T U A K

Sebedau tu kala nganjung post pasal MOONSHINE kitai Iban tauka dikelala agi enggau kangau Arak Langkau. Bida Ai Tuak (Rice Wine) tu enggau Arak Langkau mina iya enda dipanduk tang diperam tauka ditapai aja. Nyadi Ai Tuak tu kira sebansa enggau wine enggau beer semina wine tu bekena buah (anggur tauka ipul) lalu enda digulai enggau gula; beer tu bekena bijirin bukai baka gandum enggau barli tauka jagung lalu dikisar tenyuh (mash) sebedau digulai enggau yis.

Nyadi gambar Ai Tuak iya ka diayanka ditu kira bisi sentimental value mimit mih laban Ai Tuak tu kira ti penudi sekali digaga niang ma aku suba. Disimpan dalam butul BACARDI, kira bisi begulai mimit enggau laluh arak BACARDI nya mih. Enti enda salah aku, digaga niang ma aku suba maya kami deka ngintu ari Gawai taun 2006. Tu nyau 2009 nyadi udah ka 3 taun Ai Tuak nya disimpan.

Maya agi mit suba agi ingat enggau niang ma begagaka ai tuak tu. Udah berau pulut tu mansau, aku tu sigi nadai kereja bukai mih tu, nyadi tukang makai kerak asi pulut ti disumai, chal enggau gula. Enti tuak tu maya umbas iya pengelama udah disimpan begulai enggau chiping, kira nyau udah bebereni, pan kira enggau belama ensepi asi manis tu tadi.

Niang ma suba kala madahka chara ngaga ai tuak tu. Kira ingat lalat mih tu laban enda ditulis ba bup. Bala menyadi bukai pan nusi lebih kurang sama mega chara iya. Tang tu nitihka pemayuh ti ka digaga, enti mayuh agi berau kira lain agi ga sukat iya.

3 kg berau pulut

3 kg gula

1 kg chiping

ai ti udah dipanduk

Panduk baka biasa berau pulut tu. Udah mansau, engkahka ba chapan ngulihka chelap. Tutuk tenyuh chiping ti udah dijembi lalu taburka ba pulut ti udah chelap. Simpan ba dalam benda, tajau tauka tung pelastik. Kira udah seminggu, udah bebereni asi pulut enggau chiping tu tadi, tau ditanjahka ai gula tu. Pengelama iya disimpan begulai enggau ai gula tu tadi kira nitihka peneka mih. Lama agi nyimpan kira bisa agi asai ai tuak nya. Pantis lalu simpan dalam butul kaca. Asi manis nya tadi agi tau dibanchak tauka digulai agi enggau ai gula baru tang asai iya enda sebaka iya keterubah sekali diluai.

Bisi pantang larang ga ngaga ai tuak tu. Ka ngaga, kira belalai mih anang nusi ngagai orang lalu anang bebaika utai ti masam baka buah maram, buah asam dampih tauka sema enggau alai ngaga tauka alai nyimpan ai tuak tu. Utaika bebau kuat baka belachan pan enda tau. Enti ka ngelarika 'pantang' tu tadi, tau taburka chabi atas penutup alai benda tauka tutup tung pelastik alai ngaga tuak tu tadi.

Maya kami diau ba Serian suba, niang aba aku bisi ga kala ngulai siti kulit kayu ba dalam butul ai tuak kena nambahka pemisa ai tuak tu tadi. Enti udah lama disimpan, ai tuak nya tadi tau mali nyadi mirah. Kulit kayu nya dikenaka sida Bidayuh ba Serian ngulaika ai tebu sebedau dituang dalam pulut tu tadi tang ai tuak gaga sida iya enda digulai enggau chiping.

Bala raban ba ruai radiokitai.com pan bisi ngayanka mayuh bansa enggau chara begagaka TUAK enggau chiping tu. Interesting ga laban mayuh amai ga bansa tuak tu. Ari tuak buah tampui sampaika tuak berunai (nanas). Enti tuak iya ka digaga enda entu nyadi tauka masam, nguji champur enggau kapuk.

Maya shooting Gawai Teresang Mansau ba Nanga Banyau, Baleh taun 2006 suba pan sebedau ngintu gawai besai, sida bisi ngaga siti sesi ensepi ai tuak sekayu rumah. Bepun ari ujung setak pala tangga sampai ujung setak kin. Umbas iya ga palau jamah nya suba. Nasit ga mina 22 pintu. Maya nya mih bisi ensepi tuak ti umbas iya penyamai, bebereni baru dibanchak.

Nyadi ai tuak tu mayuh guna iya kelebih agi maya ngintu ari besai, ngintu penatai temuai, ngintu maya bisi adat miring tauka kena ngangatka isi aja. Maya ari Gawai pan kekadang bisi pekit ngiga tuak ti manah. Taja pia, mayuh agi rebak baru diatu baka rindu agi ngirup ai bisa ti bukai lalu ngelengkaka ai tuak tu.

TUSUN URUP JAKU IBAN

Sebedau tu, kala nganjung post pasal "Pantun Bulan" ti dikarang niang Dunging Anak Gunggu tu. Nyadi, niang tu ukai mina tebilang enggau pantun bulan ti dikarang iya, tang dikelala mega laban udah bisi numbuhka tusun urup jaku Iban (Iban Alphabet).

Iban Alphabet

Nyadi tusun urup jaku Iban tu enti nitihka iya keterubah, bisi dalam 77 iti urup tauka characters ti nyemaka munyi leka jaku Iban suba tang udah dipantis tauka diubah baru ulih niang Dunging tu nyadi 59 iti urup aja, ketegal bisi ripit lalu kira bisi ngelui ba munyi nya tadi.

Suba bisi diayanka ba suratkhabar madahka siku lecturer ari UiTM Sarawak, Dr. Bromley Philip madahka benung ngemasuk tusun urup Iban tu dalam komputer (ASCII fonts) begulai enggau saup sida Linguist Software ari siti kompeni ti asal ari Amerika Syarikat tu.

Nyadi niang Dunging tu ti asal ari Nanga Ulai, Rimbas mega kira chukup tebilang enggau penemu lalu pengelandik iya numbuhka utai ti baru. Maya Sarawak tu dipegai Jepun suba, chukup mih pemerinsa maya nya. Dia niang Dunging tu lalu bisi begagaka kasut, seluar, baju ujan, sereta bekena getah rangkai kena nganti minyak gas.

Pelaba aku mayuh agi utai udah digaga sereta utai baru ti ditumbuhka niang Dunging Anak Gunggu tu. Arapka bala Iban rebak baru diatu tau nitih penemu sereta pengelandik niang tu numbuhka utai ti baru, utai ti mantai tauka bekena main asal kitai Iban sereta semampai ngangkat nama Iban ngulihka dipeda bansa bukai.

TUN JUGAH

Tun Jugah ada ba Merirai, Kapit dalam taun 1903. Apai Tun, Barieng Anak Gawing lalu indai Tun, Menti Anak Melintang. Maya beumur dalam lebih kurang 4 taun, bala sida sebilik mindah ke Baleh. Bisi sampai lebih kurang 8 taun sida sebilik diau ba Baleh sebedau mindah ke Kapit ketegal diasuh perintah British maya nya. Udahnya dalam 1922 nya baru sida sebilik ulih pulai baru ke menua Baleh.

Tun Jugah tu maya agi mit sigi dikelala ari pementas iya enggau apai indai sereta mantaika komitmen ti tinggi sema pengawa nya besangkut-paut enggau pengawa diri sebilik. Apai indai Tun sereta aki iya mega bagas ngajar sida Tun sebilik mantaika adat ti manah ba bala mayuh lalu ari jaku ajar apai indai iya tu mih ti mayuh nyaup Tun bekaul, ngiga penemu enggau pengelandik pasal pengidup kelebih agi maya diau ba pesisir menua.

Keterubah iya Tun kereja mina bumai bekebun aja sereta rindu begiga tauka ngasu. Dia Tun lalu dikelala bala mayuh kelebih agi ba bala ti sama rebak enggau iya ketegal pengelandik iya ngintu sebarang pengawa ti diintu iya. Tun mega rindu bejalai, nyau kekadang bebulan pengelama iya laban pengerindu iya deka begiga sereta nguji utai ti baru dalam pengidup iya.

Ari penyuah iya bejalai sereta pemayuh alai ti udah ditengah Tun tu tadi mih, dia iya lalu ulih ngerapat kaul enggau bansa ti bukai baka sida ari bansa Kayan enggau Kenyah.

Dalam taun 1928, Tun Jugah lalu dipaduka nyadi Penghulu maya iya beumur lebih kurang 25 taun. Keterubah iya, kira enggai mih tudah Tun laban maya nya Tun benung ba Malaya lalu bedau ka pulai ke menua. Tambah mega iya empu elaun sema nyadi Penghulu pan naka $5 sebulan. Tun pan ngasaika diri iya enda tentu bisi mayuh penemu senentang adat istiadat kitai Iban maya nya.

Taja pia, Tun dipilih laban iya anak ketuai sekali dalam sida sebilik lalu aki iya Penghulu Melintang sigi chukup tebilang dalam nguluka bala serakup ba Merirai. Tambah mega Tun rapat kaul enggau Temenggung Koh iya nya temenggung ti keterubah iya bagi Iban lalu Tun mega dipeda bala mayuh sigi ngam amai nguluka bala ketegal iya empu pengelandik, penemu sereta juluk ati iya.

Dalam taun 1930-an, Tun betemu enggau Puan Sri Tiong lalu ari nya Tun seduai Puan Sri bulih 4 iku anak, Datuk Amar Leonard Linggi, Edmund Erong, Siah enggau Sani.

Dalam 1940-an Tun mula bejinak dalam dunia dagang. Tajapan nadai sekula tang Tun jampat ngulihka penemu dagang tu. Dia Tun lalu ngerembaika dagang dalam betanam getah, ngintu pengawa bot seperis pia mega dalam pengawa balak.

Tahun 1952, Tun Jugah enggau Majlis Negri lalu udahnya Majlis Tertinggi dalam taun 1956. Maya nyadi Pengerusi Majlis Daerah Kapit ti keterubah iya, Tun mayuh ngemansangka bidang pendidikan pia mega sukut pengerai tauka perkhidmatan kesihatan. Tun mega dipaduka nyadi Temenggong bagi bahagian ketujuh Sarawak dalam Perkhidmatan Ketua Masyarakat sereta Presiden Majlis Adat Istiadat Negeri sebedau mutus deka ngetu dalam politik.

Tun Jugah nadai kena ka 8 Julai 1981 lalu dikuburka ba kubur Methodist Kapit, Jalai Selirik. Niang diberi Pingat Darjah Yang Mulia Seri Mahkota Negara (SMN) ti mai gelar Tun.

Mayuh udah diatur ulih sida perintah dalam ngenang utai ti digaga Tun dalam ngemansang bansa kelebih agi ngagai bansa Iban. Tajapan enda besekula tang Tun Jugah nyau dikira baka Menteri Pelajar ketegal pengerindu iya meda bala anembiak maju dalam pelajar.

Tun Jugah dikelala ari setail buk iya, nya kebuah dini aja alai iya bisi mindah maya nya, Tun Jugah nyau kira nyadi ikon bansa. Tun mega sigi dikelala enggau basa iya, pemaruh ati iya sereta mina minta dikangau Jugah aja.

Bala orang ti ngelala Tun, kelebih agi sida ti rapat kaul sereta bala ti dipegai Tun tu suba mayuh agi ngangau Tun Jugah enggau gelar, "Apai". Ngarapka semua perjuangan Tun Jugah semampai dikenang bala Iban lalu seruran dikenyadika teladan dudi ari dalam ngemansangka bansa.

KANANG ANAK LANGKAU

Diadaka ba Kerangan Manuk, Nanga Meluan, Kanowit kena 2 Mac 1945. Kanang tu anak kelima ari enam iku sida menyadi. Apai iya Langkau Anak Iban lalu indai iya Bija Anak Entisa. Maya agi mit, Kanang sigi umbas iya ga pemanchal, nya kebuah dikangau enggau nama "Manchal". Kanang mina besekula tiga taun aja, ari 1957 naka 1959 ba Local Authority School ti suba dikenyadika Kubu Brooke. Maya agi mit tu mih Kanang bagas enggau Aki iya ngasu, begiga, nyala sereta enggau nangkal. Ari Aki iya tu mih Kanang bulih mayuh penemu pasal ngasu, pasal utan sereta survival ba utan tu kelebih agi utai ti mali (pantang larang) maya lebuh ba utan, bebasa enggau sebarang utai ti idup ba utan, "macha" utai ti nyadi ba sekitar utan tu sereta anang mayuh macham utai lara maya bejalai ba utan.

Kanang nyadi sedadu tu kira secara kebetulan aja mih. Maya nya Kanang baru 17 tahun lalu benung nganjung lebih 40 iku sida ba rumah panjai ti benung deka interview minta nyadi sedadu ba Kubu Brooke tu. Udah nanchang tali perau, maya nganti sida tu tembu mih, dia tuan (Orang Putih) ka ngaga interview tu bepansa enggau Kanang lalu mesan tudah Kanang meli barang ba kantin enda jauh ari nya lalu minta iya nganjungka rumah tuan tu tadi. Meli mih tudah Kanang tu lalu terus dianjungka bilik tuan tu tadi. Dia iya, laban udah teleba enggau orang putih lalu terus ngemas bilik tuan tu tadi. Pulai tuan tu tadi meda peneleba sereta meratika pemanah kereja tudah Kanang tu lalu terus mai Kanang, milih iya nyadi sedadu. Nyadi ari 40 iku sida serumah nurun interview tu tadi naka iya siku aja mih bulih tajapan tuju iya ukai ka enggau orang nyadi sedadu. Udahnya mega Kanang tu mega antara tiga orang ba bahagian tengah Sarawak udah dipilih nyadi sedadu, Sarawak Rangers.

21 April 1962, keterubah iya Kanang AnaK Langkau nyadi Sarawak Rangers sebedau nitih latihan ba Jungle Warfare School di Ulu Tiram, Johor. Maya nya mih iya nusika cabaran sereta penguji lebuh benung training tu ngichaka bala sedadu ka dilatih tu kering, tan, mahir sereta ulih telabanka musuh. Udah tembu latihan, Kanang tu tadi lalu bulih gawa ba 42nd Royal Marine Commandos. Maya nya mih penemu sereta pengelandik Kanang lebuh ba utan berupai amai dipeda kelebih agi penemu iya dalam mematikan (nungkupka) jerangkap samar tauka booby trap (panjuk) sereta pengelandik iya mengesan (ensium penatai) munsuh.

25 Mei 1965, Kanang kawin enggau Helen Latai Anak Intie. Maya nya Kanang benung betugas ba Simanggang. Dia seduai iya bulih 6 iku anak, 2 laki sereta 4 indu lalu nyau beteresak memagang bala anak seduai tu diatu, nyau udah bisi 9 iku uchu seduai iya. Siku ari anak iya udah nitih sama nyadi sedadu ba Kem Batu 3, Pahang.

Prinsip perjuangan Kanang tu suba sigi "Agi Idup Agi Ngelaban". Selagi bejuang tu, selagi nya mih anang ngemantaika bendira putih, pantang undur sebedau ajal, biar putih tulang anang putih mata. Sepanjai udah gawa nyadi sedadu tu, Kanang bisi udah terlibat dalam 2 pertempuran besai, Gerak Setia 8/79 di Hutan Korbu (1979) sereta Gerak Khas Setia 1980 ba kawasan Tanah Hitam, Perak.

Maya Gerak Setia 8/79 tu mih sida platun Kanang ulih ngalahka sida komunis dalam misi nya lalu dia Kanang udah nimbak mati 2 iku komunis sereta nyelamatka siku kaban iya ti bakal teruk. Taun 1980, Kanang lalu dianugerahkan Pingat Keberanian Kedua Tertinggi Negara iya nya, Panglima Gagah Berani (PGB).

Maya Operasi Gerak Khas 1980 ba kawasan Tanah Hitam ti dikira Kanang siti peristiwa paling bersejarah mih dalam pengidup iya. Operasi maya nya digaga ketegal siku bala pengelikun menua udah nadai ba kawasan nya lalu sida dikerah menjejak lalu ngapuska bala munsuh tu. Bisi datai 11 ari bala platun sida Kanang tu begigaka alai munsuh lalu maya tetemuka alai munsuh, sida bertempur lalu naka mih peluru munsuh mansa nyau beterubuh bakaka ujan, enda nemu ngetu.

Maya nya mih Kanang ti sigi udah benung bakal kena timbak, mansang nulung nyelamatka kaban iya ti udah cedera teruk lalu udahnya mega kena 3 agi tembakan peluru munsuh ngujungka iya lalu enda sedar agi. Maya dianjung ngena bilun engkabang, sigi kira udah kritikal amai bakal cedera ba Kanang tu. Bisi seminggu Kanang koma ba sepital besai KL lalu udah iya ngeleda, Kanang dirawat nyau ka datai setaun ba sepital nya. Teringat mega cherita, Kanang nusi pasal pejalai iya ba menua siti maya iya benung koma nya.

Bala sida ka meda pendiau tudah Kanang sigi enda nyangka ia tau ulih selamat. Ari pemerani Kanang tajapan udah bakal, tang mansang nyelamatka bala platun ti cedera nya mih iya lalu dikurniakan siti da agi anugerah tertinggi, Anugerah Seri Pahlawan (SP) lalu nyadi renjer keterubah iya nerima pingat tu. Udah nya Kanang nerima mayuh pingat, enda ngira ari Angkatan Tentera Malaysia tauka Kerajaan Negeri Sarawak. Lalu tiap kali Ari Pahlawan, bala sida iya veteran sedadu tu kelebih agi Kanang Anak Langkau, enda tinggal enggau menghormati sida ti udah nadai.

Maya interview Kanang taun 2007 tu suba, sigi meri tabi puji mih enggau iya laban pemaruh ati iya deka bekunsi pengalaman sereta nyaup semua pengawa kami, ngujungka penggambaran dokumentari "Kanang Anak Langkau" bejalai enggau mujur. Ari menua iya Kerangan Manuk kin, sampai ba Melaka, Perak, Pahang enggau Johor kin pejalai kami begigaka bala sereta alai Kanang udah gawa lalu tiap nya diatur sereta digaga enggau lanchar, enggau bantu ti diberi iya.

Ujung taun tu tadi, sempat bepansa enggau Kanang seduai bini sereta siku ari uchu iya, ba pasar Serian dia sebedau sama mupukka Sri Aman. Sempat betabi lalu betanyaka berita. Ngarapka aya Kanang semampai mujur gerai lantang sereta meruan dikenang dalam pengawa iya kelebih agi maya dalam sama ngemataka pengelikun menua kitai.

Kanang Anak Langkau, "AGI IDUP AGI NGELABAN".

B E R M U K U N

** dirikut ngena handphone aja : kualiti visual/audio enda berapa jelas

Maya Rumah Terbuka RTM Kuching kenaka 28-30 November 2008 sempat ngerikut bala sida SARAWAKfm ti muka booth MUKUN BISTARI kena bala sida ngemantaika pengawa BERMUKUN. Sarinya ujan bangat amai turun, nyadi nyau ka lemai baru bisi didinga sida tu betabuh. Ngerikut enda lama sebedau mupuk pulai, lalu sempat meda bala sida WAIfm ngatur Pertandingan Akhir Lagu Etnik 2008.

Enti nitihka sejarah bemukun tu suba, iya bepun lalu mayuh agi dipejalaika bala sida laut kelia. Selalu iya, maya begendang nya dibai tauka dipimpin bala indu ti dikangau seh gendang sereta ditawing siku da agi indai gendang tauka tukang malu gendang. Sebedau begendang tu, bala sida indu tu ditutup ngena kain ti mina ulih ditelai ulih bala laki tauka sida ka betanda bejugit ba luar. Nyadi sida seh gendang tu mih alai bala sida lelaki bebalas pantun, bemukun, lalu bebai tauka betarit maya lebuh betanyaka indu. Lebuh maya betanya (belagu / bemukun) tu mih kekadang nyau tau mai charut ba sida bala laki tu tadi sampai bisi kes belaya, bedendam enggau bebunuh lebih agi ketegal berebutka indu. Nya kebuah jarang digaga bemukun sebedau melah pinang tauka besanding.

Kira nyau baka kitai Iban ka berandau (enda bemukun) pasal nguai mih nya kini maya betanyaka indu, nyau kekadang tau enda nyadi ketegal enggai nguai/ngugi.

Tang diatu bemukun tu mina dikena merindang bala penatai orang mayuh kelebih agi maya ari besai bisi pengerami lalu mega maya nyambut sereta merindang bala pemesai. Lalu diatu mega bemukun tu enda agi digaga betutup betelai sereta jarang tauka enda agi dikena maya betanyaka indu.

Teringat maya ari besai ba rumah panjai, rindu ga ninga bala sida ibu-ibu tu betabuh lebuh maya udah ngirup. Tajapan kekadang mina bepaluka beledi enggau kuntina, chapuh mih jamah nya. Siti ti kira meri tabi puji amai ngagai bala sida ibu ti betabuh bemukun tu. Tajapan enda nemu surat, tang landik amat sida nusun leka jaku besenimbal, ti spontan tapi releven tauka sangkut-paut enggau situasi maya nya, lalu enda lari ari leka main Iban.

Nyadi tu mina rangkap penudi sekali ba pantun mukun ti diayanka ditu :

Hari-hari pergi ke kebun,
Di dalam kebun tanam semangka,
Kitalah bernyanyi, berpantunlah pantun,
Ciptakan saya pantun merdeka,
Kitalah menyanyi berpantunlah pantun,
Ciptakan saya pantun merdeka.

MOONSHINE / ARAK LANGKAU

Bisi dua iti reti MOONSHINE tu : iya nya pajar bulan keleman tauka panchar bulan maya malam ari. Nyadi siti da agi reti MOONSHINE tu, iya nya siti bansa arak ti digaga belalai tauka dikumbai mega arak pelesu laban iya empu tahap alkohol enda nitih sukat ti setindit (kelalu tinggi / enda betaka / begulai bahan champur tauka perengka ti enda patut tang sebaka asai).

Nama kebuah iya dikangau MOONSHINE mungkin ketegal maya sida begagaka arak tu maya malam ari, maya pajar bulan keleman sereta digaga belalai. Maya nyual iya pan sida enggai dipeda kelebih agi ulih sida polis tauka sida ti ngibun pengelikun menua.

Ba menua kitai Sarawak tu, MOONSHINE tu dikelala bala mayuh tauka dikumbai kitai ngena nama arak LANGKAU. Ketegal bulih nama langkau tu enda ga pasti, engka laban maya begagaka arak tu suba, mina diluai sereta diintu ba langkau aja mungkin ketegal nyamai dirumpang, dirubuh tauka mindah kelebih agi enti deka ngelarika perengka maya sida polis bisi deka nangkap.

Kelia menya bedau ngelala arak langkau tu bala kitai Iban. Kitai lebih agi dikelala enggau Ai Tuak tauka Ai Pengayu. Penatai bala sida dagang ari menua tasik kelebih agi sida ari menua China bisi mai sekali teknologi sida iya begagaka arak baijiu ari berau wangi baijiu tauka bansa arak shanhua jiu. Nyadi chara manduk arak tu mih dititih bala kitai Iban menya tang bekena berau pulut, chiping sereta gula.

Bida arak langkau (liquor) tu enggau tuak (rice wine) iya nya, arak tu dipanduk (distilled) lalu tuak tu diperap (fermented) tauka ditapai. Nyadi arak langkau tu kira ai tuak ti dipanduk lalu munyi ka laut - "melalui proses penyulingan sejatan" ngena perengka iya empu (still) kena misahka sereta nyelapka asap meruap berau, gula enggau chiping ti dipanduk nya tadi. Tuak tu kira sebaka enggau wine (anggur / buah) tauka beer (barli / gandum / bijirin) laban iya disimpan, diperap tauka ditapai lalu enda dipanduk sebedau digulai enggau ai gula kena meri asai agi lalu disimpan baru nitihka pengelama tauka pemisa iya. Makin lama ai tuak tu disimpan, makin bisa asai iya. Bida wine enggau ai tuak mina iya enda digulai enggau gula tang digerami enggau chiping aja laban buah baka anggur bisi asai manis iya empu. Bida beer tu enggau ai tuak mina maya begagaka sebarang beer, ia ditutu tenyuh (mash) dulu sebedau digerami enggau chiping. Kandungan alkohol ba ai tuak mega kira ti pemadu tinggi (18-25%) sema bandingka enggau bansa wine (10-20%) tauka beer (3-8%).

Nyadi ujung taun tu tadi bisi begigaka arak langkau ti manah dikena bala mayuh ba rumah panjai maya ngintu 100 ari niang apai sereta nyemin kubur niang. Tetemuka siti alai ngaga langkau tang bida iya mina ngena jagung, ukai berau pulut. Semadi nganti arak langkau tu penuh, aya ka nyual langkau tu bisi ngayanka sekeda langkau iya ti diperap enggau 'perengka' bukai.

• 1 & 2 Langkau digulai enggau kuin sampuk (ngumbai nya tinduh/matar keterubah meda),
• 3 & 4 Langkau digulai utai chapi enggau rusa,
• 5 & 6 Langkau digulai enggau anak tenggiling,
• 7 & 8 Langkau digulai anak kera / nyumbuh,
• 9 & 10 Langkau digulai anak pelanduk,
• 11 Langkau digulai empedu jugam enggau empedu entambah/kesindap/semawa,
• 12 Langkau digulai enggau ati rusa enti enda salah ingat aku. (nyau palau kini nya wai...hihihi...)

Enda kala aku tetemuka utai bakanya tang mali mula, bisi ga nguji ensepi sekeda. Kenu ku aya nya, langkau ti manah nadai ngerusak tauka enda ngemalika pendiau keterubah utai ti digulai. Enti langkaunya enda manah, utai ti digulai nya pan melepu sereta kembai.

Nyadi sebarang utai ti dipanduk kelebih agi gula ba langkau tu bisi ngundanka siti bahan kimia iya nya ethanol. Chara maya manduk sereta perengka kena nyuling enggau nyejat arak langkau tu tadi mih nentuka pemanah tauka kualiti arak langkau. Tang ngenangka arak langkau tu digaga enda belesen nyadi nya kebuah iya enda nitih setindit ti patut (enti bisi lesen mesti bisi setindit ABV tauka alchohol by volume) lalu asai iya pan enda sebaka, pelesu, lalu kekadang bisi mega begulai enggau perengka ti enda patut baka spirit tauka methanol ngichaka tan sereta chiru lalu bisa agi asai (kira berentak agi mih kenu ku jaku).

Sema dibandingka enggau wiski, brandy tauka gin (dipanduk sereta bisi unsur spirit), chara ngaga iya pan sebaka mina disimpan dalam alai ti manah (kayu oak bagi wiski) kena nentu kualiti asai enggau warna ti tuchi. Chara nyendiaka iya pan ngena perengka ti udah diperesa kualiti iya lalu enda sebarang. Sekeda perengka dikena ngaga arak langkau mayuh enda sesuai sereta tau ngenataika pemerinsa tauka munuh sema enda dijaga (bisi ngena perengka baka radiator kerita). Tepuk dada tanya selera mih.

Enti deka nguji tau mega, ngulai buah kurma (nitihka pemayuh langkau, anang kelalu mayuh enggaika manis) perap dalam ai langkau. Lama agi manah agi. Tauka sebedau nyadungka bala, gulai enggau limau nipis sereta ipul ijau ti udah disirap mit. Simpan semalam (lama agi manah agi mih) ba dalam peti ais.

Maya ngirup sebarang arak, enti ulih anang ngirup tuchi arak. Gulai mimit tauka shandy enggau ai soda. Anang ngelanggak lalu minta ai irup tauka ai amat, laban arak begulai enggau ai chelap tau ngerusak buah pinggang enggau ati. Ngirup mih sebebengkah, ngetu seminggu dua (hihihi....no way nadai jalai nya kenu ku aya aku) lalu anang mih kelalu udu sekali ngirup tu, ta nembu sampai nyengala mabuk, nadai ngalau ila lusa.

** Rindu agi ngirup Ai Tuak, ai bansa kitai ti asal. Dundering inderaip.

B U L A N

BULAN TURUN PANGGUL

Bulan Lima* (tauka bulan April). Bulan tu Iban manggulka umai bukit.

BULAN SANDIH TUNDAN

Bulan Nam* (tauka bulan May). Bulan maya Iban nebang kayu rimba, kayu besai, kayu kempung.

BULAN TUJUH

Bulan Tujuh* (tauka bulan June).

BULAN BELANGGANG REBAN

Bulan Lapan* (tauka bulan July). Bulan dikena Iban ngerangkaika reban umai bukit.

BULAN KELEBUN

Bulan Sembilan* (tauka bulan August). Bulan Iban nunu enggau berengkah nugal umai bukit.

BULAN LABUH BENIH

Bulan Sepuluh* (tauka bulan September). Bulan Iban nugal umai bukit.

BULAN GANTUNG SENDUK

Bulan Sebelas* (tauka bulan October). Bulan maya Iban bagas ambis padi/kurang berau.

BULAN CHECHANGUK

Bulan Duabelas* (tauka bulan November). Bulan Iban badu mantun umai bukit.

BULAN PANGKA DI LABU

Bulan Satu* (tauka bulan December). Bulan maya padi bukit baru-baru tuai buah.

BULAN EMPALAI RUBAI

Bulan Dua* (tauka bulan January).

BULAN EMPERAGA/ EMPIKAP

Bulan Tiga* (tauka bulan February). Bulan Iban nyau ngetau padi bukit.

BULAN LELANG/KELELANG/PELELANG

Bulan Empat* (tauka bulan March). Bulan Iban lepa pengawa, nya alai sida nguna awak tu alai begiga, pegi, tauka ngayau.

* bulan Iban/bulan dilangit (bulan January - December nya bulan nitih kelinda orang putih tauka kelinda perintah)

diambi ari bub "Jaku Dalam"

- ditusun Janang Anak Ensiring & Robert Menua Salleh

(The TUN JUGAH FOUNDATION : 2006)

P A N T U N B U L A N

PANTUN HARI SATU
(dikumbai Nendak beensumbar Burung Bagak Nyawa Mayuh Lagu)

Tu aku bejaku lalu deka belagu

Nampung Sengalang Burung Tuntung Menaul Sidu

Terebai ngulu sungai datai ngagai ulu

Kitai udah diau dalam hari minggu

Pagila kitai gawa jaku hari Satu

Pengawa barang tunga peneka diri empu

Giga pengawa ngena peda dalam buku

Bacha surat sekula dama tangga Satu

Dia pengawa ngena dijangka ati aku

Rugi udah meli rega satu ribu

Pagila kitai gawa aram nitihka aku

Nendak burung bagak nyawa mayuh lagu

Ia mungkal dama disebut hari Satu

Kena kitai Dayak bejalai kili kulu

Burung kitai pindah ngagai rumah baru

Jaku orang kelia ke temu aku

Bumai kitai nyamai pakai diri empu

Bisi bulih lebih jual kili kulu

Tu naka jaku badu aku sulu

Semua kita ninga tu jaku aku

Badu aku bejaku lagu hari Satu

Belajar udah abis orang Ai Ngelan.

Belajar jaku Cina kaban orang Merikan

Tu naka jaku dinga semua kaban.

PANTUN HARI DUA

(dikumbai Jampong beensumbar Burung Gegar Balat Inggar Nyawa)

Aku deka belagu dinga kita semua

Nampong Sengalang Burong Tuntong Menaul Banda

Tadi hari satu pagila hari dua

Gawa kitai pagila nurun sama sereta

Bujang sama nyingkang sereta enggau dara

Bini enggau laki sama sereta dua

Biak enggau tuai gawa sama sebaka

Nunda orang kelia teruba muka menoa

Pagila kitai gawa ngereja getah pera

Bulih duit mimit bisi kai belanja

Berunggu satu minggu nadai ngetu kereja

Jampong burong gegar balat inggar nyawa

Pala bisi jugu bulu ia banda

Kena orang kelia berimba ngaga menua

Bumai kereja kitai alai dua tiga

Tusah baka kai udah nadai ulih jaga

Kelia lain pengawa dia lain kereja

Menya main berimba dia macha sekula

Tu naka jaku jerita Hari dua.

PANTUN HARI TIGA

(dikumbai Ketupong ke beensumbar Burung Bisu Bejaku Seleka Dua)

Aku deka belagu kita semua ninga

Nampong Sengalang Burong Tuntong Menaul Banda

Tadi hari dua pagila hari tiga

Pengawa barang ngena nadai salah kereja

Giga pengawa ngena dijangka bisi rega

Bumai ngiga pemakai kena ngidup kai nyawa

Pengawa orang kelia berimba ngaga dunya

Ketupong burung bisi nyawa seleka dua

Lebuh jadi Jaloh mayuh munyi nyawa

Lebuh ia runggu nyawa enda berapa

Kelia kebun taya dia kebun pera

Suba pelandai ara kemaya macha sekula

Patut kitai miting berunding sama-sama

Ngiga pengawa ngena jalai bulih belanja

Diau anang berandau nadai bisi guna

Betundi anang agi nadai bisi rega

Ketawa anang lama gaga pemanah ia

Bungah anang suah tau seleka dua

Belaya anang lama tusah kitai bechara

Tu naka jaku jerita hari Tiga

Ngetu aku sulu belagu enggau nyawa

PANTUN HARI EMPAT

(dikumbai Beragai ke beensumbar Terebai Kebab-kebap)

Aku deka belagu mayuh utai tiap

Ngibai burung beragai terebai kebap-kebap

Dada mansau jera mata kesap-kesap

Kelia kebun taya indu gawa ngebat

Bujang ngaga ilang kena sida bepantap

Tuai ngaga kerurai kena sida ngajat

Mayuh ngambuh sangkuh kena sida besilat

Ngelaban orang utan belangkau enda tetap

Wan satu bulan alai sida angkat

Jaku orang tuai tusui Aki Bat

Jerita Aki Mara tusui Aki Dap

Kai temu aku disimpan dalam surat

Tadi hari Tiga pagila hari Empat

Patut kitai miting berunding tubuh empat

Bumai mayuh alai selalu main angkat

Tusah sepi aku kati penemu buat

Nengeri balat rami orang nadai angkat

Begulai rumah panjai pengawa enda tetap

Berundang abis tulang bejalai segap-segap

Tu nak ajaku jerita hari Empat

Ngetu aku sulu badu aku Igat

Badu aku Endu ngetu aku Wat.

PANTUN HARI LIMA

(dikumbai Kelabu ke beensumbar Burung Runggu Bejaku Enda Lama)

Aku deka belagu ninga semua kita

Tadi hari Empat pagila hari Lima

Kelabu burung runggu bejaku enda lama

Umai kereja kitai nadai tau dilengka

Kelabu burung runggu mai kitai gawa

Tusui aki aku kati aki kita

Adi mai aku kati nuan ika

Patut kitai miting adi enggau aka

Lemai kitai begulai pagila kitai gawa

Pagila gawa langkau panjai buka lima

Kelabu bisi bejaku pagila kitai gawa

Tusah baka ke udah jera langkau suba

Langkau udah tembu kitai gawa ari nya

Berunggu satu minggu sampai ngagai lima

Bumai tanah bukit paya bisi dia

Tu naka jaku jerita hari Lima

Ngetu aku sulu belagu dinga kita

Lagu tu manah kena ulih kita

Enti lagu jai buai kanan kiba

PANTUN HARI ENAM

(dikumbai Embuas ke beensumbar burung bagas bemunyi kiba kanan)

Aku deka belagu dinga kitai Iban

Tadi Hari Lima pagila Hari Enam

Embuas burung bagas bemunyi kiba kanan

Ngarak kitai gawa betanam mayuh macham

Pera bisi rega nya tau tanam

Pengawa kai ngena gawa siang malam

Kereja kitai salah buai tau tikam

Kitai mesti miting berunding tiap malam

Sara kitai pengawa mayuh endar macham

Peda pengawa ngena ambika teladan

Nunda orang kelia bisi ke chuan

Lauk nadai suntuk ikan agi ngaban

Bechara salah gaya ngelaban diri sekaban

Patut kitai miting berunding genap malam

Ngadu adat baru kena kitai Iban

Ngena penemu lama enda tentu tan

Kelia orang ngaga patut kena tanggam

Kena enda lama sebulan jangka tan

Tu naka jaku jerita Hari Enam

Pagila kitai gawa nebas madang resam

Aku nadai penamu barang ku nuan

PANTUN HARI TUJUH

(dikumbai Sengalang ke beensumbar Lang Rimba diau nyepuh sangkuh)

Aku deka belagu dinga kita mayuh, Gawa udah lama nyau pedis tubuh

Berunggu satu minggu selalu pansut peluh, Diau bai aku semua kitai mayuh

Pengawa Lang Rimba diau nyepuh sangkuh

Tadi Hari Enam pagila Hari Tujuh

Pagila kitai miting berunding bala mayuh

Nyara dama pengawa semaya jaku timpuh

Ni bagi dudi nya pengawa taruh

Nganti bulan sigi timpuh bala mayuh

Patut kitai tinduk sampai pukul tujuh

Nya baru makai ngagai pukul sepuluh

PANTUN BULAN

(Bulan Satu kitai Iban lalu bulan June kalendar orang putih - bulan kitai Iban kelia manggul)

Aku deka belagu dinga kitai Dayak

Nampung Sengalang Burung Tuntung Menaul Rimba.

Tu ga bulan satu kena kitai gawa.

Nganjung ga paung burung temuda bali rimba.

Ngintai nyawa Beragai kanan enggau kiba.

Semua kitai sereta adi kaban aka.

Kitai kereja umai seneka ati ka.

Umai gaga besai rapas mata ga meda.

Tebas ga kita badas miau kanan kiba.

Mantap ga kitai jimat takutka kaki kena.

Tebas ga anang besai panjai buka lima.

Nganjung ga paung burung terubah kitai gawa.

Menua ga tanah bukit menua tanah paya.

Nadai salah alai tau alai gawa.

Umai ga anang mindah tusah baka suba.

Burung ga udah dianjung ngetu ga enda lama.

Tiap ga ari empat sampai ngagai lima.

Ngetu satu minggu baru kitai gawa.

Udah ga kitai ngetu gawa sebarang tunga.

Ngereja ga getah pera ngambi belanja kemaya nya.

Tu ga naka jaku gerah kitai gawa.

Semua kita ninga adi kaban aka.

Bulan Dua Belas (Bulan Kelelang)

Aku deka belagu dinga semua orang.

Gelumu ga sida indu sama enggau bujang.

Nampung Sengalang Burung Tuntung Menaul Lang.

Bulan dua belas dama bulan kelelang.

Ngetau ga badu ati kitai lantang.

Kitai ga hari besai nunda bansa orang.

Belumba main belanda ngujika tulang.

Sapa kitai kering nya ga menang

Ngerintai adat gawai kitai ngambi orang.

Gerah ga bilang rumah kitai sama ngadang.

Kitai hari besai dama bulan lelang.

Tiap udah genap nadai bisi kurang.

Dia kitai ga miting runding sama terang.

Ngaduka adat baru nunda bansa orang.

Nyimpan ga dama bulan nadai tau ilang.

Nyara dama pengawa nadai tau kurang.

Niap dama surat semua nemu magang.

Sekula ngaga angka dara enggau bujang.

Tusah bakaka udah alah laban orang.

Duit kitai mimit ni tau menang.

Nginjau kelalu nyampau tusah mayar utang.

D i k a r a n g : D u n g i n g A n a k G u n g g u