DIAU SEKEJAP

Deka Ngetu Enda Lama.....

"Diau Sekejap"

GAWAI DAYAK 2009

Meri Selamat Ngintu Ari Gawai Dayak

ngagai semua bala menyadi,

kaban-belayan sereta raban blogger.

Pia mega ngagai semua bala Dayak

ti sama ngerami ngintu

Ari Gawai Dayak ti deka datai.

Ngajihka Semua Kita

Gayu Guru Gerai Nyamai,

Lantang Senang Chelap Lindap Nguan Menua

Betuah Belimpah Diatu Sampai ke Belama Iya.

RITMA GAWAI KAAMATAN

Kiruh nembu rakaman program "Ritma Gawai Kaamatan" tu tadi. Diatu benung kiruh editing. Disadang ka keluar ba TV2 lalu sekeda lagu bala artis Sarawak bisi diayan baru ba Kenyalang@Muzik Aktif. Ila update iya empu tarikh enggau waktu siaran.

update :

TV2 (30 Mei 2009, Saturday, jam 4:00pm),

Muzik Aktif (Channel 180 Astro kenaka 31 Mei 2009, Sunday jam 3:00pm).

Artis ti bisi enggau; Urai "Selamat Gawai Dayak", Nor "Idup Berambun Ai Mata", Ernesto "Jeanne...Dalam Mimpiku", Falicia Gek "Selamat Gawai Dayak" enggau Nelson Kenedy "Sina'a". Artis Sabah, kumpulan Da' Prinz (kala enggau Gangstarz) enggau Hara Hanara (finalis maya Worldstars Road to Hollywood)

Sempat mega neman bala sida ari Sabah, ngeranjai ba VA enda lama. Malas bala sida maya mai ngeranjai ba Shenanigan's enggau Razz Ma Tazz suba.

Selamat Gawai Dayak,

Gayu Guru Gerai Nyamai.

Kotobian Tadau Tagazo Do Kaamatan,

Kumaa Dikoyu Toinsanan.

6 TAUN

15 April kira baru genap masuk ke-6 taun udah gawa enggau Kementerian Penerangan tu. Diatu nyau betukar nyadi Kementerian Penerangan, Komunikasi dan Kebudayaan. Menteri pan ari suba berapa kali udah betukar. Logo, rancangan, konsep, pengisian, fokus, pendekatan enggau sasaran pan berubah-ubah.

6 taun. Enti disema enggau umur nembiak, sigi udah ka masuk Primary 1 nya taun depan. Benung nganti, nama perubahan ti deka dikenatai menteri baru tu ila. Mesti bisi aja utai ka ditukar, diperbaharui, diperkenalkan, ditambah, dikurangkan, diagihkan, digandakan sereta dibiarkan.

Tang kira ngenang nasit diri empu tu mih. Semampai baka anak tiri betukar apai indai. Betukar orang ka ngibun, diri tu semampai dianaktirikan. Kitai ka balat agi asuh besapu, sida kebukai ti mayuh agi disagu. Baka colour bar nya mih iya. Mayuh ragam churak, mayuh bansa warna, mayuh maya deka ngena. Tang iya mina bisi sigi aja munyi tone. Maya gawa enggau sida company swasta suba colour bar tu mih diperati sereta diintu enggau memanah sebedau ngatur production laban deka meri kualiti ke standard agi. Tang diatu, ngena waveform pan enda. Lembau nusi, laban dipeda baka baru 6 taun.  

BERAU BARU

Pulai ke menua (TR Jarop, Nanga Changkol, Lubok Antu) enda lama maya ujung minggu tu tadi, semadi bisi kemisi panjai maya Good Friday enggau Easter Sunday. Sempat manchak gambar jalai ti dipansa senentang Batu Bebini sereta sebedau simpang masuk ke Nanga Changkol.

Ni nemu bisi mali' dalam setaun dua tu. Selalu maya sebedau Gawai Dayak bisi aja ditabur batu baru ngichaka nyamai agi bala mayuh ti deka pulai ari mengeri ulih nengah jalai nya.

Senentang setiap jematan ari Lubok Antu sampai San aja sigi lama udah dipelakin. Suba agi ingat, maya mansa jematan nya, semina ngena jematan besi (bailey bridge) aja. Bekau jalai dikena balak maya nya suba.

Sempat nyembi padi baru kena setuk sebulan dua sebedau pulai baru maya kemisi Gawai Dayak bulan 6 tu ila. Nyembi padi bajong begulai enggau sambah. Suba maya gawa ba KL bendar bala kaban laut mesan berau sambah laban nyamai amai digagaka nyadi asi lemak.

Bala sida ibu, ini, ika nyaup magang nyembi. Ngena 4 iti perampan maya nyembi, tang mina 2 guni padi bansa bajong enggau sambah aja iya ka dijembi.

Nasit mega mua hari manah maya nyembi nya. Bendar amai ujan ngelama tu. Udah nyau kira tuai padi dijembi, nya baru ujan mupuk beterubuh mansutka leka. Bendar beguai muat padi, nyau belanda bala sida ibu, sida ika pan nyaup. Lemai nya lalu terus nginjin padi. Mayuh mega bala enggau nginjin sekali. Ini' pan enggau nginjin kena dibai iya ke Kuching.

Rindu ninga nyetat injin padi tu. Suba maya bisi nginang itit, sigi diulih sekaunya kena ngulai asi itit. Rindu meda bala itit ensirut nyedut sekau begulai enggau asi itit nya.

Enda berasai hari pama udah ba menua. Pulai ke Kuching hari satu tu kemari. Ini' iya ke ngena baju belang ba gambar nya enggau sekali mih, laban deka ngabas anak sereta uchu iya ba Siburan enda lama. 

Assapai, minta ampun ngagai bala raban ke mesan ijuk laban nadai bulih ijuk tu. Nadai nanduk ijuk bala ba rumah panjai maya nya. Nyau bendar agi ngelaban langkau. Enti ka langkau, ila mai... :P

Πάσχα

Kemisi panjai ujung minggu tu. Nuju bala raban Kristian, selamat bepuasa pagila maya Good Friday lalu sama ngerami sereta bela ngenang Easter Day.

"Those controlled by the sinful nature cannot please God. You, however, are controlled not by the sinful nature but by the Spirit, if the Spirit of God lives in you. And if anyone does not have the Spirit of Christ, he does not belong to Christ. But if Christ is in you, your body is dead because of sin, yet your spirit is alive because of righteousness. And if the Spirit of him who raised Christ from the dead is living in you, he who raised Christ from the dead will also give life to your mortal bodies through his Spirit, who lives in you".

Romans 6 : 8-11

LUI CHA

Kemari sempat keluar enda lama dibai Regina Ho seduai Alice Wee makai lui cha ba Green Road dia, berimbai simpang Jalai Intan enggau Jalai Tengah. Kira keterubah iya mih nya, nguji makai lui cha tu. Taja pia, lui cha nya sigi antara pemakai ti umbas iya mega tebilang ba Kuching ditu, kelebih agi ba bala sida ti ari raban bansa Hakka tu.

Enti sema keterubah iya makai, sigi amai tekenyit enggau asai iya. Tusah ka nerang baka ni asai lui cha tu. Betul-betul organik, nyau ngasai diri nyadi baka vegetarian aja maya makai nya.

Tang favourite aku, iya empu sup gadung nya. Berasai kekelat tabar baka makai teh herba tang maya begulai enggau bala sayur enggau kachang tanah sereta perengka bukai ti digulai dia, tau berasai manis.

Tajapan enda teleba makai tu, mayuh utai ti gadung sereta disedia mata' lalu nyau tak bechampur mih asai; ni ti kelat, manis, tabar, tang pelaba aku sigi manah mih enti diempa selalu. Tau mulaika pengerai sereta pemanah ngagai tubuh.

Nadai nyual ai irup ba alai dia. Mina bisi nyendia siti ai ti dikumbai sida Sup 5 Rasa. Agi belala, taja enda kala ensepi terubah iya. Ila ngejung kia baru, mai bala raban bukai....

Enggau ruang sereta peluang tu mega, deka meri TAHNIAH ngagai Malcolm Mussen Lamoh laban udah menang enggau majoriti 1,854 undi maya bepilih ba sitak parlimen N29 Batang Ai dia, kena 7 April 2009 tu tadi.

DERMA DARAH

Bejalai ba Hock Lee Centre tadi lalu tepansaka orang benung derma darah ba dia. Lama udah enda derma darah tu, enti enda salah, ke penudi sekali maya bulan 3 taun nyin suba.

Lalu ngerejistaka diri, laban enda mai kad penderma. Ngelama tu sigi dibai ba dalam kerita, nyau puas ngiga lalu enda tetemuka alai. Ngisi pom dulu mih. Mayuh utai ditanya : "demalam umbas tinduk?"....eerrr...meda AF7 enggau Project Runway sereta enggau segulai nitih madamka api ketegal 60 Earth Hour... ba rumah aja mih. "Bisi ngirup?"....eerrrrr... nadai.... :-P 

Terubah sekali, diperesa sida darah dulu, tekanan darah 120/80 lalu darah grup A+. Maya nuchuk jarum udah temu alai, tang darah enggai ga pansut. Keterubah, ba lengan kiba, udahnya mindah ke lengan kanan. Ba lengan kanan nyau dua iti bekau tuchuk jarum laban tuchuk ke keterubah pan darah enggai mega pansut. Enda baka keterubah iya derma darah suuuuuba. Baru dituchuk aja nyau ngenyit menuh pek darah.

Paduhal bisi blok iya empu perengka. Udah diganti, nya baru ka pansut. Assapai... enda lama udah nya, meragam agi. Nemu ngetu ga, taja pan bedau tentu penuh. Bendar ngadu alai endur nuchuk lalu diasuh ngenggam kuat agi.

Udah tembu derma darah, diberi sida ngirup sereta makai refreshment mimit. Diberi sida kad nyadi tanda udah derma darah sarinya lalu diberi mega siti beg (bisi diengkah sida ruti sebungkus enggau siti pek tusu).

Bebekau tangan kiba enggau kanan. Deka maut steering kerita, pan berasai tetengut. Naka-naka mih berasai lelak udah derma nya tadi. Enda kala berasai baka nya ngelama tu. Engka sigi nyau lanjut usia mih tu kini.

Teringat randau enggau orang ba dia maya benung derma darah. Betanya mih tudah kaban nya, ari ni alai penatai, lalu madahka diri orang Lubok Antu. Uiiiihhhh... enda enggau orang nurun ngundi nuan ila, kenu ku tudah kaban. Hehehe....tetuchum aja enda nyaut. Sapa diundi nuan?... hehehe... enggai nyadi ga nyaut ba mua mayuh. Anang ngundi tuuttt nuan, ngundi tuuttt tau, sambung tudah kaban nya. Hehehe... tetuchum diau aja tudah aku. Udah rejista nuan?... errrrr... hehehe....ketawa.

Engka udah digelam semengat tudah kaban nya tadi, ketegal enda nyaut, engka nya mih kebuah darah aku nyau meragam enda tentu deka pansut. Engka ketegal enda ngirup demalam mega kini. Tauka darah benung enggai ninga randau pasal bepilih maya nya....

14

semadi deka ngenang saritu

14 March 2009

MU 1-4 Liverpool

Idup Libapul

"Yul Niba Wuk Elun"

semalam ba MIRI

Ba Miri kira semalam aja laban deka shooting ba ANP Music Production Sdn. Bhd. bisi ngaga interview enda lama enggau Andrewson Ngalai betanya pasal Industri Muzik Dayak kena diayanka ba dokumentari "Aok..Bah!"

ANP Music Production Sdn. Bhd. tu kira baru 10 taun udah ditubuh belabuh ari taun 1998, lalu nyentuk ke diatu udah ngeluarka lebih ari 80 buah album sereta bisi lebih ari 10 iku artis rakaman.

Terubah iya belagu tauka nyadi artis rakaman dalam umur 18 taun enggau lagu ti keterubah iya "Udah Laun Tua Betemu", Andrewson Ngalai dikelala antara artis tebilang ti dikeluarka ari TBC, siti kompeni rakaman ba Sibu dia berengkah ari taun 1988-1998 sebedau muka kompeni rakaman kediri empu.

Taun 2008 tu tadi meda Andrewson Ngalai tebulihka Anugerah "Most Successful Dayak Male Singer" maya Anugerah Muzik Dayak 2008 (DaMA 2008) ti di atur ulih sida DCCI.

Udah ngaga interview, bala kami nyambung shooting cut-aways dikena insert dalam interview nya sereta ngambi gambar-gambar ba opis enggau rakaman ba studio. Nyau ngalih ari baru tembu lalu berumban mega laban deka terus mupuk ke Sibu.

Sebedau mupuk, mai bala krew ngetu enda lama merarau, matahka lengan ba waterfront dia laban deka makai asi lelapan. Sida ke bukai mesan ayam penyet, aku nguji lelapan tongkol.

Agi belala makai. Ila enti ke Miri kia baru sigi nuju kia mih tu laban umbas iya ga. Mina belachan tauka sambal iya kira enda telabanka sambal nasi ayam penyet ba Kafe Bunda, Kuching.

Mupuk ke Sibu ngetu enda lama ba Bintulu, tetemuka siti alai makai enda jauh ari Park City Mall dia, nguji Roti Tiga Rasa. Roti Bakar ti dibalut enggau ruti canai sereta diengkah cheese, mayonnaise, telu guring sereta kaya enggau marjerin. Udahnya mesan ai teh c peng special.... lelak sereta ngantuk lalu enda mih berasai jamahnya.

Ka nguji nyumai tu enti bisi endur.... Taja pia, semalam ba Miri mai mayuh kenangan. Terima Kasih bala sida ba ANP Music Production kelebih agi Andrewson Ngalai seduai Johnny Aman, pia mega aya JAG, siku ari raban radiokitai.com laban bendar mai raun ba Miri dia. Agi belala ngeranjai dia. Tang beguai deka mupuk baru ke Sibu.

PEGARI IBAN PRODUCTION

11 March, Wednesday..... ngaga shooting enggau sida Pegari Iban Production, bisi udah besemaya deka interview Tuai Besai PIP, Johnny Chuat kena diayanka ba pakej ari Sarawak dalam rancangan Hujung Minggu Malaysia sereta dokumentari..

Laun mimit bala kami datai, laban ujan lebat tumu pagi nya meri penanggul mimit bala krew ngangkut perengka kena shooting. Taja pia, maya datai ba PIP tekenyit meda semua udah besedia deka shooting kelebih agi Tuai Besai PIP ti benung rabat maya nya. Ngenataika penyinu ati ngagai Tuai Besai PIP sereta sida sebilik ketegal bisi bala aya sida iya udah nadai ba menua sida di Nanga Kesit, Lemanak din.

Set-up lampu enggau kamera, nyendiaka diri ngaga interview enggau Johnny Chuat. Bendar betukar penuduk ketegal begiga angle ti sesuai. Ari taun 2007 nyin suba deka ngemansutka pengawa sida PIP tu ba TV tang malar aja nadai endur. Meda diri bulih sengkaum baru enggau ngaga program Selamat Pagi Malaysia dalam taun 2009 tu, nyadi lalu bekena peluang tu mih.

Minta bala sida belakun mimit tauka mock-up sebarang rutin tauka pengawa ti digaga bala sida ba PIP dia. Selain Tuai Besai, datai mega maya nya Ujih Stia (Editor/Pengarang), Dora Beti (Sekretari/Artis Grafik), Sedau Panting (Tuai Akaun) sereta siku anembiak praktikal ari Politeknik Mukah, Samuel Albert.

Tuai Besai PIP seduai Sedau benung milih cover Pegari Vol 30

Dora seduai Samuel benung edit sereta ngaga lay-out

Ujih benung edit karang ka dianjung bala pemacha

Selain ngeluarka Pegari, sida PIP ngeluarka majalah hiburan Senawah

Bulih siti copy Gempung Jerita Tuai Bansa Iban.

Novel bekena jaku Iban ti keterubah iya dikeluarka PIP

Semua rakaman bejalai enggau lanchar laban semua utai ka dipadah ulih Tuai Besai kira chukup terang. Tembu shooting nyau kira udah ngalih ari. Kira beguai mega bala kami krew laban deka terus mupuk ke Miri. Meri besai terima kasih mih ngagai sida PIP laban nyaup nembu shooting nya enggau lanchar sereta nyendiaka semua bahan ti dikena bala kami dalam post-production nya ila.

Enda teringat amai deka nanya Tuai Besai PIP, nama perkembangan terkini Kamus Iban-Iban ti disadang deka dikeluarka sida iya dalam taun 2009 tu.

11 March, Wednesday.... Ngantuk amai sari nya laban bendar meda Champions League, tim Liverpool ngasak Real Madrid, 4-0. Semangat... besemangat amai jamah nya. Menang enggau aggregat 5-0. Enda sabar nganti Libapul betemu enggau Mencista baru, kenaka 14 March tu, pagila mih nya. Sarinya (13 September 2008) maya sida betemu ba Anfield, Liverpool menang begaya 2-1, siap enggau tim Mencista tu ngaga gul kediri. Assapai... ngarapka kemenangan bergaya berulang sekali lagi...

Stibin Jerat namaka 2 gul mantu Libapul menang 4-0 ngelaban Rialmederit

11 March, Wednesday.... Tumu pagi ari tiga nya mega bisi nerima SMS ari menyadi ka biak sekali, Jang, madah bini iya udah ngadaka anak laki, 3.2kg dalam pukul 12:45 a.m. Madah ngagai Jang, aku pan diadaka dalam jam 12:45 tang maya ngalih ari (p.m.). Kemari Jang nusika diri bisi meli tikit maya draw sarinya tang pansut ba Magnum 2451. Assapai..... dahlah 1st prize.... sayau enda ngepow.

Datai ba Miri lemai sarinya, mai bala krew ngetu ngirup ba Ming Cafe. Pekena tosai paper. Lama enda makai tosai. Udahnya check-in sebedau keluar enggau aya JAG (raban radiokitai.com, John Adam Gilbert) seduai bini iya sereta mega Temenggung enggau indai tuai iya.

Udah makai, lemai nya dibai aya JAG raun sekitar bandaraya Miri dia. Sempat mega ngirup ba rumah aya JAG sesambil meda video enda lama, ngirup baru... sebedau supper pekena nasi lemak special. Fuiyo.... boleh tahan amai. Enda ingat penama alai pemakai nya. Selera-something-something... Enda berasai abis, tajapan sigi udah kenyang.

Nyau tengah malam baru datai ba bilik. Ka ngabas sereta update blog pan nyau enda larat amai.

13 March, Friday..... Mata tu diatu pan nyau palur. Lelak amai tajapan mina nepan kerita ari Sibu-Kuching sepanjai ari tu tadi. Mupuk jam 0900 ari Sibu, datai ba Kuching jam 1800. Sempat ngetu ba Sarikei, Layar, enggau Sri Aman.

Baru aja datai ba Kuching, terus dibai enggau bala sida akak aku sebilik dinner ba batu 11 dia. Sempat betemu 2 iku kawan lama, Anding Nyuak seduai Flora Intai ba dia. Assapai... lama enda betemu enggau seduai iya tu. Enda nyangka seduai nyau udah bulih 2 iku anak bujang.....