BINTULUfm

Shooting ba BINTULUfm saharitu. Sempat manchak gambar studio alai sida mancharka BINTULUfm bekenaka gelumbang 97.5mhz. Sebedau belabuh gawa, mai bala krew ngirup enda lama. Enda alah terlanjur terlebih bersemangat manchak gambar lagi, lalu tersasar waktu rehat makai ngalih ari.... hihihi...

Shooting ba luar sekitar bangunan lama BDA ba Jalai Sommerville dia, sereta ba depan pintu masuk BINTULUfm enggau tempat bala sida teknikal (MCR) sebedau shooting ba dalam studio BINTULUfm. Jam ba studio baru 11.47am. Enda lama agi baru bagi Iban belabuh. Semadi nganti, set-up kamera enggau lighting dulu.

Bagi Iban mina 3 jam aja belabuh ari jam 12 ngalih ari sampaika pukul 3 lemai. Maya benung nganti DJ MCL duty ngalih ari nya, sempat mega meda DJ Zilla ari SIBUfm benung gawa.

BINTULUfm mina beroperasi dalam 10 jam aja, belabuh ari jam 9 pagi nyentukka 7 lemai. Ngarapka ulih didinga ba internet secara online mih.

Bulan 3 tu giliran DJ MCL (SIBUfm) seduai DJ Jenny (WAIfm) duty ba BINTULUfm tu ketegal bedau bulih DJ tetap ba alai dia. Ni tuju DJ Jenny nya tadi. Kitai deka manchak gambar iya, lalu ngelarika diri enda bepadah. Ngular ya?!!!.. grrrrr.... pahai temu boss lagi. Nadai iya macha blog aku, anang irau.

Maya benung on-air terubah ukai main nervous tudah DJ MCL tu, enda ngadang diri deka diambi gambar ulih sida TV. Taja pia, udah angat injin ukai main agi nuan nih. DJ MCL lalu mali nyadi ManChaL. Siap ngeranjai bala krew TV. Sempat nujuka lagu ngagai raban radiokitai.com ari Bintulu kelebih agi indai SILA (msscymexx) seduai unggal Maxel. Enda sempat nulis nama bala sida masz cvank, encabuh2, antu buyuk, ucurentap, gia depa, kelabaiFC etc. Minta ampun enti enda tesebut nama auk?...

Assapai.... Enda sempat minta lumur talipaun nuan DJ MCL. Enti enda, ka mega mai ngirup lemai ba Bintulu dia. Sayau enda serambau. Keluar lemainya udah tembu shooting, sempat betemu enggau kazen Maxel. Naka penyigat nuan unggal, gentleman amai nuan. Terima kasih ngagai nuan kazen laban sudi melanja makai ba Pizza Hut enda jauh ari Park City Mall dia. Enti nemu nuan deka melanja, besai agi pizza order aku tadi... wakaka... Anang jera begulai enggau keranjaimanok unggal.

IndaiSILA mina talipaun aja, madahka diri enda ulih datai. masz cvank, enda sempat aku betemu enggau nuan wai. Seluar Valentine's Day enda mih ulih diberi. Taja pia, badu ngayanka diri enda beseluar nuan ba ruai auk masz... hihihi... Jilis meda penyigat unggal Maxel, enggai alah aku, lalu nganjung diri begunting enda lama ba Park City Mall. Bisi mega ninggalka bekau ba Bintulu. Kena kempat kelalu pandak, nyau ka sebaka enggau buk bujangcmanggang ga penyadi iya..... ish...

KOMPIA SIBU

Ba Sibu enda lama, kira semalam aja laban bisi ngaga shooting ba LUH Production Sdn. Bhd. interview enggau Jackson Dana, sebedau mupuk ke Bintulu.

Mupuk ari minggu jam 9.00 pagi ari Kuching lalu datai ba Sibu dalam jam nyau ka pukul 4 lemai. Ujan enda ngetu sepemanjai jalai ari Kuching sampai Sibu kia. Sempat meda 3 iti kerita iksiden senentang jalai Kuching-Serian sereta enda jauh ari Sebangkoi dia. Semadi nganti ujan ngetu, manchak gambar Gerbang Sibu enda lama.

Macham biasa mih tu, enti ke Sibu kia mesti enda ngelengka makai kompia tu. Enti bisi endur lama agi, ka mega ngambi gambar ari keterubah iya disedia sampai tembu mansau. Tang berumban amai, lalu nadai endur mih deka ngayanka chara sida nyendia kompia tu.

Kompia masin bisi ditabur bijan. Lalu kompia manis, berupai besai agi sema bandingka saiz iya enggau kompia masin. Enti meli kompia masin, RM1 bisi lima iti lalu kompia manis nya bisi 4 iti aja seringgit.

Kompia Masin

Kompia Manis

Sempat meli bekal kira umbas kena maya pejalai ari Sibu-Bintulu kia aja. Ila maya mulaika diri ke Kuching kia, tau mih meli mayuh agi. Mina meli ti asai masin enggau manis aja laban nya ti pemadu dikerindu. Bisi asai bukai kelebih agi bansa ka bisi puak nya. Tang rindu agi ensepi ti masin enggau manis tu.

Maya ba Sibu, enda sempat betemu enggau bujangcmanggang ketegal kaban benung tabin. Nadai entu pengerai. Cheettt!!!... orangka disadang nyadi tourist guide ngaga diri not available nih. Taja pia, lantang ati sempat betemu sereta betabi jari enggau Indaikanu tauka sarawaklady. Assapai, asaika enggai pulai jamah Indaikanu. Enda kekijap mata meda pemajik... hihihi.... pahai kena ipa Ah Seng, Sanjay, Wis enggau Jolly ba pasar Sibu tu ila...wakaka.

Sebedau mupuk ke Bintulu, sempat dibai Jackson Dana makai ba alai enda jauh ari opis sida iya dia. Dicadangkan makai mee jawa sumai laut dia, wahduh... pama iya ga. Enda berasai nyau lichin pinggai. Enda teringat manchak gambar iya.... hihihi... lapar beb. Terima kasih Jackson.....

LAMA ENDA PULAI

Lama enda pulai ke Nanga Changkol, Lubok Antu. Lelengau asai ati, singin ga ka pulai tang malar aja bisi pengawa ujung minggu. Penudi sekali pulai pan bulan 12 tu tadi maya ngintu ari Krismas, nyemin kubur niang Aba lalu terus ngintu 100. Udah nya ngintu taun baru sekali ba rumah panjai, taja pia palau amai lalu enda sempat enggau bala berendam mandi ba Batang Lupar malam ngintu taun baru. Begiga gambar ba menua lalu tetemuka gambar maya benung pulai kin bulan 10 taun nyin suba. Ari jauh tepedaka jalai nyau bekedebu aja jamah dipansa balak maya benung ka niki senentang bukit ba Batu Bebini dia.

Naka pengelubah lori balak nya niki, nyau ka nuju da mimit balak ka panjai nya ba cheremin kerita. Don't drive and ngachitka camera...kenu ku cigu kami suba...hihihi... tang perasan ga pemesai sekeda balak nya, nyau mesai ulih dichekak pan bisi ga diambi sida iya tu. Nasit ga udah bisi kerita diatu. Suba nepan motorsikal pulai. Pama datai ba rumah panjai, berasai amai ngulihka tekang debu ti tama idung. Alah jamah kena kelita tinduk atas sadau maya agi mit suba. Bedau agi sema maya nepan lori suba, buk nyau tengkering baka udah ngechuk kaler gold. Mua pan nyau sama nitih tengkering, puas ngerising.

hihihi... nyau salah tekan gear... pahai injin, kati enda tau pass maya test kerita suba. Nya baru sentang ba Batu Bebini dia. Bedau agi sentang niki Bukit Melaban enda jauh ari Nanga Empit sereta SK Melaban. Dia bagas agi enda tetikika bukit laban malar aja salah gear kena. Tambah mega, ngena batu kerangan begala sereta tanah pan lemi. Ka pan enda mih, jalai dia sigi meruan bakanya belama. Bai iksiden maya nyadi guru sandaran suba kala mih maya mai motorsikal. Batu mina ditaburka aja ba jalai lalu enda dipirit. Nya kebuah maya tetujuka batu ti ditabur ba lubang, nyau melunggik motorsikal. Sempat ngaga 3 somersault penuh bergaya sebedau landing nyungkur batu. Bedau expert nuan mai motorsikal, kenu ku niang Aba.

Lori balak nya tama ba simpang ke Merakai, Indonesia kin. Enti enda salah balak ke diulihka sida iya nya, enda jauh ari Panjai Ruai dia. Aku macham biasa mih, terus ke Nanga Changkol. Berunding mega.... hmmmmmmm.... what to do. Nganti jalai ari Nanga Changkol rembus ke Engkilili tembu aja tu, ngulihka enda lawit tama simpang Lubok Antu mansa pasar. Nyamai agi enti jalai nya udah tembu manah, ulih nengah ari Engkilili terus ke Nanga Changkol aja. Enda mih tebasau jam enggau minyak enti udah nengah ari simpang Engkilili nya aja ila.

Nanga Changkol.... salam lelengau. Bulan 4 ila baru ulih pulai.

T U A K

Sebedau tu kala nganjung post pasal MOONSHINE kitai Iban tauka dikelala agi enggau kangau Arak Langkau. Bida Ai Tuak (Rice Wine) tu enggau Arak Langkau mina iya enda dipanduk tang diperam tauka ditapai aja. Nyadi Ai Tuak tu kira sebansa enggau wine enggau beer semina wine tu bekena buah (anggur tauka ipul) lalu enda digulai enggau gula; beer tu bekena bijirin bukai baka gandum enggau barli tauka jagung lalu dikisar tenyuh (mash) sebedau digulai enggau yis.

Nyadi gambar Ai Tuak iya ka diayanka ditu kira bisi sentimental value mimit mih laban Ai Tuak tu kira ti penudi sekali digaga niang ma aku suba. Disimpan dalam butul BACARDI, kira bisi begulai mimit enggau laluh arak BACARDI nya mih. Enti enda salah aku, digaga niang ma aku suba maya kami deka ngintu ari Gawai taun 2006. Tu nyau 2009 nyadi udah ka 3 taun Ai Tuak nya disimpan.

Maya agi mit suba agi ingat enggau niang ma begagaka ai tuak tu. Udah berau pulut tu mansau, aku tu sigi nadai kereja bukai mih tu, nyadi tukang makai kerak asi pulut ti disumai, chal enggau gula. Enti tuak tu maya umbas iya pengelama udah disimpan begulai enggau chiping, kira nyau udah bebereni, pan kira enggau belama ensepi asi manis tu tadi.

Niang ma suba kala madahka chara ngaga ai tuak tu. Kira ingat lalat mih tu laban enda ditulis ba bup. Bala menyadi bukai pan nusi lebih kurang sama mega chara iya. Tang tu nitihka pemayuh ti ka digaga, enti mayuh agi berau kira lain agi ga sukat iya.

3 kg berau pulut

3 kg gula

1 kg chiping

ai ti udah dipanduk

Panduk baka biasa berau pulut tu. Udah mansau, engkahka ba chapan ngulihka chelap. Tutuk tenyuh chiping ti udah dijembi lalu taburka ba pulut ti udah chelap. Simpan ba dalam benda, tajau tauka tung pelastik. Kira udah seminggu, udah bebereni asi pulut enggau chiping tu tadi, tau ditanjahka ai gula tu. Pengelama iya disimpan begulai enggau ai gula tu tadi kira nitihka peneka mih. Lama agi nyimpan kira bisa agi asai ai tuak nya. Pantis lalu simpan dalam butul kaca. Asi manis nya tadi agi tau dibanchak tauka digulai agi enggau ai gula baru tang asai iya enda sebaka iya keterubah sekali diluai.

Bisi pantang larang ga ngaga ai tuak tu. Ka ngaga, kira belalai mih anang nusi ngagai orang lalu anang bebaika utai ti masam baka buah maram, buah asam dampih tauka sema enggau alai ngaga tauka alai nyimpan ai tuak tu. Utaika bebau kuat baka belachan pan enda tau. Enti ka ngelarika 'pantang' tu tadi, tau taburka chabi atas penutup alai benda tauka tutup tung pelastik alai ngaga tuak tu tadi.

Maya kami diau ba Serian suba, niang aba aku bisi ga kala ngulai siti kulit kayu ba dalam butul ai tuak kena nambahka pemisa ai tuak tu tadi. Enti udah lama disimpan, ai tuak nya tadi tau mali nyadi mirah. Kulit kayu nya dikenaka sida Bidayuh ba Serian ngulaika ai tebu sebedau dituang dalam pulut tu tadi tang ai tuak gaga sida iya enda digulai enggau chiping.

Bala raban ba ruai radiokitai.com pan bisi ngayanka mayuh bansa enggau chara begagaka TUAK enggau chiping tu. Interesting ga laban mayuh amai ga bansa tuak tu. Ari tuak buah tampui sampaika tuak berunai (nanas). Enti tuak iya ka digaga enda entu nyadi tauka masam, nguji champur enggau kapuk.

Maya shooting Gawai Teresang Mansau ba Nanga Banyau, Baleh taun 2006 suba pan sebedau ngintu gawai besai, sida bisi ngaga siti sesi ensepi ai tuak sekayu rumah. Bepun ari ujung setak pala tangga sampai ujung setak kin. Umbas iya ga palau jamah nya suba. Nasit ga mina 22 pintu. Maya nya mih bisi ensepi tuak ti umbas iya penyamai, bebereni baru dibanchak.

Nyadi ai tuak tu mayuh guna iya kelebih agi maya ngintu ari besai, ngintu penatai temuai, ngintu maya bisi adat miring tauka kena ngangatka isi aja. Maya ari Gawai pan kekadang bisi pekit ngiga tuak ti manah. Taja pia, mayuh agi rebak baru diatu baka rindu agi ngirup ai bisa ti bukai lalu ngelengkaka ai tuak tu.

TUSUN URUP JAKU IBAN

Sebedau tu, kala nganjung post pasal "Pantun Bulan" ti dikarang niang Dunging Anak Gunggu tu. Nyadi, niang tu ukai mina tebilang enggau pantun bulan ti dikarang iya, tang dikelala mega laban udah bisi numbuhka tusun urup jaku Iban (Iban Alphabet).

Iban Alphabet

Nyadi tusun urup jaku Iban tu enti nitihka iya keterubah, bisi dalam 77 iti urup tauka characters ti nyemaka munyi leka jaku Iban suba tang udah dipantis tauka diubah baru ulih niang Dunging tu nyadi 59 iti urup aja, ketegal bisi ripit lalu kira bisi ngelui ba munyi nya tadi.

Suba bisi diayanka ba suratkhabar madahka siku lecturer ari UiTM Sarawak, Dr. Bromley Philip madahka benung ngemasuk tusun urup Iban tu dalam komputer (ASCII fonts) begulai enggau saup sida Linguist Software ari siti kompeni ti asal ari Amerika Syarikat tu.

Nyadi niang Dunging tu ti asal ari Nanga Ulai, Rimbas mega kira chukup tebilang enggau penemu lalu pengelandik iya numbuhka utai ti baru. Maya Sarawak tu dipegai Jepun suba, chukup mih pemerinsa maya nya. Dia niang Dunging tu lalu bisi begagaka kasut, seluar, baju ujan, sereta bekena getah rangkai kena nganti minyak gas.

Pelaba aku mayuh agi utai udah digaga sereta utai baru ti ditumbuhka niang Dunging Anak Gunggu tu. Arapka bala Iban rebak baru diatu tau nitih penemu sereta pengelandik niang tu numbuhka utai ti baru, utai ti mantai tauka bekena main asal kitai Iban sereta semampai ngangkat nama Iban ngulihka dipeda bansa bukai.

TUN JUGAH

Tun Jugah ada ba Merirai, Kapit dalam taun 1903. Apai Tun, Barieng Anak Gawing lalu indai Tun, Menti Anak Melintang. Maya beumur dalam lebih kurang 4 taun, bala sida sebilik mindah ke Baleh. Bisi sampai lebih kurang 8 taun sida sebilik diau ba Baleh sebedau mindah ke Kapit ketegal diasuh perintah British maya nya. Udahnya dalam 1922 nya baru sida sebilik ulih pulai baru ke menua Baleh.

Tun Jugah tu maya agi mit sigi dikelala ari pementas iya enggau apai indai sereta mantaika komitmen ti tinggi sema pengawa nya besangkut-paut enggau pengawa diri sebilik. Apai indai Tun sereta aki iya mega bagas ngajar sida Tun sebilik mantaika adat ti manah ba bala mayuh lalu ari jaku ajar apai indai iya tu mih ti mayuh nyaup Tun bekaul, ngiga penemu enggau pengelandik pasal pengidup kelebih agi maya diau ba pesisir menua.

Keterubah iya Tun kereja mina bumai bekebun aja sereta rindu begiga tauka ngasu. Dia Tun lalu dikelala bala mayuh kelebih agi ba bala ti sama rebak enggau iya ketegal pengelandik iya ngintu sebarang pengawa ti diintu iya. Tun mega rindu bejalai, nyau kekadang bebulan pengelama iya laban pengerindu iya deka begiga sereta nguji utai ti baru dalam pengidup iya.

Ari penyuah iya bejalai sereta pemayuh alai ti udah ditengah Tun tu tadi mih, dia iya lalu ulih ngerapat kaul enggau bansa ti bukai baka sida ari bansa Kayan enggau Kenyah.

Dalam taun 1928, Tun Jugah lalu dipaduka nyadi Penghulu maya iya beumur lebih kurang 25 taun. Keterubah iya, kira enggai mih tudah Tun laban maya nya Tun benung ba Malaya lalu bedau ka pulai ke menua. Tambah mega iya empu elaun sema nyadi Penghulu pan naka $5 sebulan. Tun pan ngasaika diri iya enda tentu bisi mayuh penemu senentang adat istiadat kitai Iban maya nya.

Taja pia, Tun dipilih laban iya anak ketuai sekali dalam sida sebilik lalu aki iya Penghulu Melintang sigi chukup tebilang dalam nguluka bala serakup ba Merirai. Tambah mega Tun rapat kaul enggau Temenggung Koh iya nya temenggung ti keterubah iya bagi Iban lalu Tun mega dipeda bala mayuh sigi ngam amai nguluka bala ketegal iya empu pengelandik, penemu sereta juluk ati iya.

Dalam taun 1930-an, Tun betemu enggau Puan Sri Tiong lalu ari nya Tun seduai Puan Sri bulih 4 iku anak, Datuk Amar Leonard Linggi, Edmund Erong, Siah enggau Sani.

Dalam 1940-an Tun mula bejinak dalam dunia dagang. Tajapan nadai sekula tang Tun jampat ngulihka penemu dagang tu. Dia Tun lalu ngerembaika dagang dalam betanam getah, ngintu pengawa bot seperis pia mega dalam pengawa balak.

Tahun 1952, Tun Jugah enggau Majlis Negri lalu udahnya Majlis Tertinggi dalam taun 1956. Maya nyadi Pengerusi Majlis Daerah Kapit ti keterubah iya, Tun mayuh ngemansangka bidang pendidikan pia mega sukut pengerai tauka perkhidmatan kesihatan. Tun mega dipaduka nyadi Temenggong bagi bahagian ketujuh Sarawak dalam Perkhidmatan Ketua Masyarakat sereta Presiden Majlis Adat Istiadat Negeri sebedau mutus deka ngetu dalam politik.

Tun Jugah nadai kena ka 8 Julai 1981 lalu dikuburka ba kubur Methodist Kapit, Jalai Selirik. Niang diberi Pingat Darjah Yang Mulia Seri Mahkota Negara (SMN) ti mai gelar Tun.

Mayuh udah diatur ulih sida perintah dalam ngenang utai ti digaga Tun dalam ngemansang bansa kelebih agi ngagai bansa Iban. Tajapan enda besekula tang Tun Jugah nyau dikira baka Menteri Pelajar ketegal pengerindu iya meda bala anembiak maju dalam pelajar.

Tun Jugah dikelala ari setail buk iya, nya kebuah dini aja alai iya bisi mindah maya nya, Tun Jugah nyau kira nyadi ikon bansa. Tun mega sigi dikelala enggau basa iya, pemaruh ati iya sereta mina minta dikangau Jugah aja.

Bala orang ti ngelala Tun, kelebih agi sida ti rapat kaul sereta bala ti dipegai Tun tu suba mayuh agi ngangau Tun Jugah enggau gelar, "Apai". Ngarapka semua perjuangan Tun Jugah semampai dikenang bala Iban lalu seruran dikenyadika teladan dudi ari dalam ngemansangka bansa.

KANANG ANAK LANGKAU

Diadaka ba Kerangan Manuk, Nanga Meluan, Kanowit kena 2 Mac 1945. Kanang tu anak kelima ari enam iku sida menyadi. Apai iya Langkau Anak Iban lalu indai iya Bija Anak Entisa. Maya agi mit, Kanang sigi umbas iya ga pemanchal, nya kebuah dikangau enggau nama "Manchal". Kanang mina besekula tiga taun aja, ari 1957 naka 1959 ba Local Authority School ti suba dikenyadika Kubu Brooke. Maya agi mit tu mih Kanang bagas enggau Aki iya ngasu, begiga, nyala sereta enggau nangkal. Ari Aki iya tu mih Kanang bulih mayuh penemu pasal ngasu, pasal utan sereta survival ba utan tu kelebih agi utai ti mali (pantang larang) maya lebuh ba utan, bebasa enggau sebarang utai ti idup ba utan, "macha" utai ti nyadi ba sekitar utan tu sereta anang mayuh macham utai lara maya bejalai ba utan.

Kanang nyadi sedadu tu kira secara kebetulan aja mih. Maya nya Kanang baru 17 tahun lalu benung nganjung lebih 40 iku sida ba rumah panjai ti benung deka interview minta nyadi sedadu ba Kubu Brooke tu. Udah nanchang tali perau, maya nganti sida tu tembu mih, dia tuan (Orang Putih) ka ngaga interview tu bepansa enggau Kanang lalu mesan tudah Kanang meli barang ba kantin enda jauh ari nya lalu minta iya nganjungka rumah tuan tu tadi. Meli mih tudah Kanang tu lalu terus dianjungka bilik tuan tu tadi. Dia iya, laban udah teleba enggau orang putih lalu terus ngemas bilik tuan tu tadi. Pulai tuan tu tadi meda peneleba sereta meratika pemanah kereja tudah Kanang tu lalu terus mai Kanang, milih iya nyadi sedadu. Nyadi ari 40 iku sida serumah nurun interview tu tadi naka iya siku aja mih bulih tajapan tuju iya ukai ka enggau orang nyadi sedadu. Udahnya mega Kanang tu mega antara tiga orang ba bahagian tengah Sarawak udah dipilih nyadi sedadu, Sarawak Rangers.

21 April 1962, keterubah iya Kanang AnaK Langkau nyadi Sarawak Rangers sebedau nitih latihan ba Jungle Warfare School di Ulu Tiram, Johor. Maya nya mih iya nusika cabaran sereta penguji lebuh benung training tu ngichaka bala sedadu ka dilatih tu kering, tan, mahir sereta ulih telabanka musuh. Udah tembu latihan, Kanang tu tadi lalu bulih gawa ba 42nd Royal Marine Commandos. Maya nya mih penemu sereta pengelandik Kanang lebuh ba utan berupai amai dipeda kelebih agi penemu iya dalam mematikan (nungkupka) jerangkap samar tauka booby trap (panjuk) sereta pengelandik iya mengesan (ensium penatai) munsuh.

25 Mei 1965, Kanang kawin enggau Helen Latai Anak Intie. Maya nya Kanang benung betugas ba Simanggang. Dia seduai iya bulih 6 iku anak, 2 laki sereta 4 indu lalu nyau beteresak memagang bala anak seduai tu diatu, nyau udah bisi 9 iku uchu seduai iya. Siku ari anak iya udah nitih sama nyadi sedadu ba Kem Batu 3, Pahang.

Prinsip perjuangan Kanang tu suba sigi "Agi Idup Agi Ngelaban". Selagi bejuang tu, selagi nya mih anang ngemantaika bendira putih, pantang undur sebedau ajal, biar putih tulang anang putih mata. Sepanjai udah gawa nyadi sedadu tu, Kanang bisi udah terlibat dalam 2 pertempuran besai, Gerak Setia 8/79 di Hutan Korbu (1979) sereta Gerak Khas Setia 1980 ba kawasan Tanah Hitam, Perak.

Maya Gerak Setia 8/79 tu mih sida platun Kanang ulih ngalahka sida komunis dalam misi nya lalu dia Kanang udah nimbak mati 2 iku komunis sereta nyelamatka siku kaban iya ti bakal teruk. Taun 1980, Kanang lalu dianugerahkan Pingat Keberanian Kedua Tertinggi Negara iya nya, Panglima Gagah Berani (PGB).

Maya Operasi Gerak Khas 1980 ba kawasan Tanah Hitam ti dikira Kanang siti peristiwa paling bersejarah mih dalam pengidup iya. Operasi maya nya digaga ketegal siku bala pengelikun menua udah nadai ba kawasan nya lalu sida dikerah menjejak lalu ngapuska bala munsuh tu. Bisi datai 11 ari bala platun sida Kanang tu begigaka alai munsuh lalu maya tetemuka alai munsuh, sida bertempur lalu naka mih peluru munsuh mansa nyau beterubuh bakaka ujan, enda nemu ngetu.

Maya nya mih Kanang ti sigi udah benung bakal kena timbak, mansang nulung nyelamatka kaban iya ti udah cedera teruk lalu udahnya mega kena 3 agi tembakan peluru munsuh ngujungka iya lalu enda sedar agi. Maya dianjung ngena bilun engkabang, sigi kira udah kritikal amai bakal cedera ba Kanang tu. Bisi seminggu Kanang koma ba sepital besai KL lalu udah iya ngeleda, Kanang dirawat nyau ka datai setaun ba sepital nya. Teringat mega cherita, Kanang nusi pasal pejalai iya ba menua siti maya iya benung koma nya.

Bala sida ka meda pendiau tudah Kanang sigi enda nyangka ia tau ulih selamat. Ari pemerani Kanang tajapan udah bakal, tang mansang nyelamatka bala platun ti cedera nya mih iya lalu dikurniakan siti da agi anugerah tertinggi, Anugerah Seri Pahlawan (SP) lalu nyadi renjer keterubah iya nerima pingat tu. Udah nya Kanang nerima mayuh pingat, enda ngira ari Angkatan Tentera Malaysia tauka Kerajaan Negeri Sarawak. Lalu tiap kali Ari Pahlawan, bala sida iya veteran sedadu tu kelebih agi Kanang Anak Langkau, enda tinggal enggau menghormati sida ti udah nadai.

Maya interview Kanang taun 2007 tu suba, sigi meri tabi puji mih enggau iya laban pemaruh ati iya deka bekunsi pengalaman sereta nyaup semua pengawa kami, ngujungka penggambaran dokumentari "Kanang Anak Langkau" bejalai enggau mujur. Ari menua iya Kerangan Manuk kin, sampai ba Melaka, Perak, Pahang enggau Johor kin pejalai kami begigaka bala sereta alai Kanang udah gawa lalu tiap nya diatur sereta digaga enggau lanchar, enggau bantu ti diberi iya.

Ujung taun tu tadi, sempat bepansa enggau Kanang seduai bini sereta siku ari uchu iya, ba pasar Serian dia sebedau sama mupukka Sri Aman. Sempat betabi lalu betanyaka berita. Ngarapka aya Kanang semampai mujur gerai lantang sereta meruan dikenang dalam pengawa iya kelebih agi maya dalam sama ngemataka pengelikun menua kitai.

Kanang Anak Langkau, "AGI IDUP AGI NGELABAN".